Mobilizazioa egingo dute bihar arratsaldeko zazpietan Laudioko Herriko plazan, asteartean gertatutako lan heriotza dela eta. Larrabetzuko Euskopan enpresan izan zen ezbeharra eta zendu zen 37 urteko gizonezkoa laudioarra zen, Aldi Baterako Enpresa batek kontratatutakoa.
SOS Aiaraldeak antolatu du protesta, horrelako gertakariak ez normalizatzeko eta prekarietatea salatzeko helburuarekin.
Eragileen mezuak
LAB sindikatuak oharra plazaratu du heriotzaren harira eta doluminak adierazi dizkie bere senideei. Halaber, honakoa aldarrikatu du: "Langileon bizitza eta osasuna interes ekonomikoen gainetik jarriko dituen lan-eredu baten alde borrokatzen jarraituko dugu". Hori da, langile erakundearen iritziz, hildako beharginei egin ahal zaien omenaldirik onena.
Izan ere, sindikatu horrek 63 lan heriotza zenbatu ditu aurten Hego Euskal Herrian eta kopuru beldurgarritzat jo du. Hori dela eta, langile guztiei zabaldu die gonbidapena mobilizazioetan parte hartzeko.
Zendutako herritarra gaur agurtuko dute Larraz ehorztetxean 19:00etan bere senideek eta lagunek. Horien artean egongo dira Sugarrak Saskibaloi Taldeko kideak. Berez, klubeko jokalari eta entrenatzailea izan zen eta horrela agurtu zuten atzo sare sozialetan:
"Sugarrak Laudiotik, gure klubeko jokalari eta entrenatzaile ohia izan zen Joshuaren heriotzagatik gure doluminik sentikorrenak adierazi nahi ditugu. Une gogor hauetan, gure babes eta maitasun osoa helarazi nahi dizkiegu familiari, lagunei eta gertuko guztiei. Beti izango zara gure familiaren parte, Joshua. Goian bego".