Laudioko EAJk prentsa oharra zabaldu du udal gobernu taldeari premiazko Bozeramaileen Batzordea deitzea exijitzeko, ostiralean Latiorro auzunean gertatutako sutea dela eta. Zehazki, oposizioko alderdiak jakin nahi du zein neurri hartu dituzten bizilagunei eta segurtasunari begira.
Alderdi jeltzalearen ustez, kezkagarria da udalerrian sortzen ari den egoera, eta kezkatuta dago horrelako gertaerek auzoetako bizikidetzan eta lasaitasunean izan ditzaketen ondorioengatik.
Aldi berean, kritikatu du EH Bilduko Udal Gobernuak ez diela eman oposizioko taldeei gertatutakoari, egindako jarduerei eta hartzen ari diren neurriei buruzko informaziorik.
Izan ere, jeltzaleek informazio guztia jaso nahi dute sutearen kausei eta inguruabarrei buruz, larrialdi-zerbitzuekin egondako koordinazioaren inguruan eta kaltetutako pertsonen eta bizilagunen egoerari egiten ari zaion jarraipenaren harira.
Halaber, alderdiak eskerrak eman dizkie larrialdian parte hartu zuten profesional guztiei, bereziki Udaltzaingoari, Ertzaintzari, suhiltzaileei eta osasun-zerbitzuei, "egoera artatzeko eta pertsonen segurtasuna bermatzeko egin duten lan, profesionaltasun eta jardun azkarragatik".