Okondon izango da Arabako Kros Txapelketaren aurtengo edizioa urtarrilaren 21ean. 10:00etatik 13:00etara egingo dira lasterketak igerilekuen eta futbol zelaiaren artean dauden zelaietan. Laudioko Atletismo Klubak antolatu du norgehiagoka. “Okondon zelai onak topatu ditugu, eta udalak erraztasun ugari eman dizkigu”, azaldu du Alberto Talledok.
Klubaren presidenteak azaldu du “kategoria guztietako” kirolariak neurtuko direla kirol-proba horretan, “eskola kategoriako federatuetatik senior eta beterano kategorietaraino”. Guztira 300 parte hartzaile inguru egotea aurreikusten dute, baina irekita dago oraindik izena emateko epea.
Bigarren postua helburu
Laudioarrak ez dira antolakuntzara mugatuko, klubeko hainbat kidek hartuko baitute parte txapelketan, “atletismo eskolako guztiek eta 40 federatuk”. Argi dute zeintzuk diren euren aurkariak: Gasteizko Alimco eta La Blanca taldeak. “Nahiko zail ikusten dugu lehengoari gailentzea, bigarren postua lortzen saiatuko gara”.
Laudion egin zen Arabako txapelketa iaz.