"Ez dakit zer izango litzatekeen gogorragoa, gimnasia uztea edo medikuntzarekin uztartzen jarraitzea"

Zaragozan Espainiako Txapelketan urrezko domina irabazi zenuen uztaiarekin, nolakoa izan zen txapelketa?

Oso ariketa zaila da uztaiarena, asko arriskatzen dut. Baina ondo eta txukun egitea lortu nuen. Oso pozik eta harro amaitu nuen txapelketa.

Antza, aurreko egunean pilotarekin egindako ariketa ez zitzaizun hain ondo atera, nola bizi izan zenuen hori gertatu eta hurrengo egunean irabaztea?

Gimnasia erritmikoan minutu eta erdi baino ez daukagu urte osoan egindako lana erakusteko, eta beti ez zaigu dena nahiko genukeen bezain ondo ateratzen.

Pilotarekin ezusteko akatsak izan nituen, eta sailkapeneko postuetan behera egitea eragin zidan horrek. Aparatu honekin ezin izan nituen finalak jokatu. Dena den, uztaiarekin ondo amaitzeko aukera izan nuen, eta ezin hobeto egin nuen ariketa.

Iaz irabazi ostean, espero zenuen aurten ere garaitzea? Nola bizi izan zenuen?

Ez, ez nuen espero. Aurten iaz baino gutxiago entrenatu dut eta txapelketa gutxiagotan hartu dut parte. Hori dela eta, segurtasun gutxiagorekin joan nintzen Espainiako txapelketara. Horregatik, garaitzeak are ilusio handiagoa egin zidan.

Aurten medikuntzako ikasketak eta kirola uztartu dituzu, nola egin duzu?

Iaz 20 ordu entrenatzen nuen gutxi-gorabehera astean. Aurten 10-15 ordu entrenatu dut. Asteren baten ezin izan naiz kiroldegitik agertu, ikasi behar nuelako, eta beste batzuetan entrenamendu orduak bikoiztu ditut. Azterketen araberakoak izan dira kirol-orduak.

Irakurri dugu kirola uztea pentsatzen ari zarela. Zuzenak dira informazio horiek? Zergatik?

Ez daukat batere argi zer egingo dudan. Kurtso hau gogorra izan da, kirol aldetik zein ikasketa aldetik presio handia jaso dudalako, bi alorretan ahal bezain ongi ibiltzeko.

Medikuntzako bigarren maila zailagoa izango da, eta gimnasian dudan mailak entrenamendu ordu asko eskatzen ditu. Beraz, ez dakit zer izango litzatekeen gogorragoa, gimnasia uztea edo medikuntzarekin uztartzen jarraitzea. Oraindik ez dut azken erabakia hartu.

Zer suposatuko luke zuretzat gimnasia uztea?

Erabaki gogorra da. 8 urte nituenetik daramat gimnasia egiten, deskantsu barik. Ez nago ohituta gimnasia ez egitera, eta seguru nago arraro sentituko naizela.

Dena den, badakit momentu hori iristear dagoela, eta barneratu behar dudan gauza bat da. Denbora pasa ahala ohituko naizela suposatzen dut.

Iaz Okondoko Jaien pregoilaria izan zinen, nolakoa izan esperientzia?

Oso polita izan zen. Emakume kirolarien izenean hitz egiteko aukera eman zidan, eta oso harro hartu nuen parte. Kirola eta berdintasuna indartzen saiatu nintzen.