Aurtengo udan igerilekuak itxita geratuko direla jakinarazi berri du Okondoko Udalak. Tokiko erakundeak nabarmendu “oso erabaki zaila” izan dela. “Aldeko eta aurkako” argudio guztiak aztertu ditu tokiko erakundeak, eta azpiegiturak irekitzea egokia ez dela ondorioztatu du, “nahiz eta igerileku instalazioak ireki eta mantentzeko irizpideetan agertzen diren gomendio guztiak bete”.
Modu horretan, herritarrak babestea du udalak helburu. “Igerilekuak eremu publikoak direnez, erabiltzaile asko biltzen dira; beraz, kutsatzeko eta birusa hedatzeko leku izan daitezke”. Udalak azaldu du zaila izango litzatekeela distantziak mantentzea, edukieraren muga kontrolatzea eta guneen desinfekzio eta garbiketa eskakizunak betetzea”.
Horrez gain, udalak nabarmendu du Okondoko biztanleriaren %23a edadetua dela. Horregatik, osasun agintarien gomendioak zorrotz jarraitzea eskatu diete bizilagunei eta baita datozen asteetan herrira gerturatu daitezkeen bisitariei. “Azpimarratu nahi dugu asko kostatu zaigula igerilekuak ixtearen erabaki 'mingarri' hau hartzea eta baliteke askok gogoko ez izatea, baina gauza guztien gainetik jarri ditugu zuhurtzia eta gure herritarren osasuna”.
