Udan igerilekuak nola ireki aztertzen ari dira Aiaraldeko udalak

Laudioko igerilekuak, artxibo irudi batean. / Fontso Larrazabal

EUDELek Eusko Jaurlaritzaren irizpideak bidali zizkien iragan astean udalei. 

Irekiko al dira udako igerilekuak? Galdera hori eskualdeko hainbat jenderen ahotan egon da azken asteetan. Iragan astean erantzunaren zati bat eman zuen Eusko Jaurlaritzak, igerileku-instalazioak ireki eta mantentzeko irizpide sanitarioen txostena plazaratuta. Dokumentu horrek dioena horrela laburbildu daiteke: igerilekuak ireki ahalko dira, baina  osasun irizpide zehatz batzuk jarraituta. COVID-19aren aurkako kontingentzia plan bat egin beharko da horretarako, eta osasun agintariei bidali. 

Urduñan, ekainaren 26tik aurrera
Gauzak hala, udalen esku dago orain igerilekuak noiz eta nola ireki zehaztea. Urduñako Udalak hartu du dagoeneko erabakia: ekainaren 26an irekiko dira hiriko igerilekuak. Taberna, aldiz, hilaren 12tik aurrera egongo da zabalik. Bainatzeko toki kopurua mugatuko dute, baina igerilekuen inguruko zelaietako sarbidea ez dute mugatuko, segurtasun distantziak mantentzeko espazio nahikoa dagoelako. Kanpoko dutxak irekita egongo dira, baina barrukoak ez, EUDELen irizpideei jarraiki. 

Laudio eta Amurrioko Udalek ez dute oraindik ezer zehaztu. “Lanean ari gara. Zer edo zer zehaztua dugunean jakinaraziko dugu”, azaldu dute. Antzeko erantzuna eman du Okondoko Udalak ere. Hala adierazi dio Jon Escuza alkateak Aiaraldea hedabideari: “Igerilekuak ireki daitezkeela ikusten badugu hala egingo dugu, baina lehentasuna herritarren ongizatea da. Osasun aldetik arriskurik egon daitekeela ikusten badugu ez ditugu irekiko”. Orozkon badute igerilekuak irekitzeko asmoa, eta aplikazio bat baliatuko dute toki kopurua kontrolatzeko.

Artziniegako udal igerilekuak, aldiz, obretan daude. Udalak azaldu duenez,COVID-19aren krisiak lanak atzeratu ditu. Hala ere, ekainaren amaierarako amaituak egotea espero dute. Orduan baloratuko dute irekiko dituzten. Aiarako igerilekuak ere obretan daude. Kasu horretan ere, behin lanak amaituta baloratuko dute nola ireki.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide