Maiatzaren 28an ospatuko dute Baserri Azoka Okondoko bizilagunek. 2019an antolatu zuten azkenekoz azoka eguna, eta bi urteko etenaren ostean, egun osko egitaraua prestatu dute berriro ere. Animaliak, tokiko jakiak eta artisauak egongo dira, besteak beste, Okondoko herrigunean.
Hasiera batean martxoko azken iganderako programatu zuten jarduera. Baina Udalak dolu-egunak ezarri zituen Martxoaren 24an Markuartun gertatutako zorigaiztoko sutean hiru bizilagun hil ostean, eta baserritarren ohiko hitzordua atzeratzea adostu zuten.
Egun osoko egitaraua
Datorren larunbatean 10:30ean zabalduko dute azoka esparrua, eskola eta parkearen inguruetan. Haurrentzako ekintza ugarik hartuko dute goizeko egitarauaren zati nagusia, egurrezko jolasak eta taloak egiteko tailerrak, besteak beste.
12:30ean batukada batek girotuko du herria eta azoka, eta 13:30ean herri-kirol erakustaldia eskainiko dute. Antzinako ogibideek ere tartea izango dute; saskigintza erakustaldia egingo baitute goiz osoan zehar. Egunari amaiera emateko, Xaiborrek dantzan jarriko ditu haurrak eta helduak, 16:30ean hasiko den disko-festarekin.