“Zentsura faxista” ezartzea leporatu dio Okondo Aurrerak Udal gobernuari, kartel batzuk kentzeagatik

Herriko faroletan jarri dituzte kartelak. / Okondo Aurrera

Oposizioko taldeak salatu du Udalak Aresketa bolatokiaren eraisketaren aurkako kartelak kendu dituela. Tokiko erakundeak, bere aldetik, argudiatu du “bide-garbiketaren arloko udal politikarekin” bat ez datozelako kendu dituztela afitxak.

“Zentsura faxista” ezartzea leporatu dio Okondo Aurrerak Udal gobernuari, Aresketako bolatokiaren eraisketaren aurkako kartel batzuk kentzeagatik. 

Oposizioko taldeak azaldu duenez, asteazkenean jarri zituzten afitxak, “Aresketako bolatokiaren harira gobernu taldeak eta diputazioak egindako lana kritikatzeko, batzuk eraikina botatzea agindu dutelako eta besteek ez dutelako ezer egin horren aurrean”.

Baina, talde politikoak salatu duenez, udaletxeko langileek kartelak kentzeri ekin zioten biharamunean. “Zergatik egiten ari ziren galdetu genien, eta esan ziguten aginduak betetzen ari zirela”.

Okondo Aurrerako kideek ustez, hori da EAJren politika Okondon, eta “faxistatzat” jo dute gertatutakoa. Era berean, “jarrera argia” eskatu diote EH Bilduri, eta “Okondoko alkatearen jauntxokeria berri hau” gaitzestea eskatu diote, bestela “zentsura politika egiteko modu gisa partekatzen dutela” ondorioztatuko dutelako. “Okondo Aurrerak ez dio inoiz alkate honek ordezkatzen duen intolerantziari eta jauntxokeriari amore emango”, ziurtatu dute. 

Udalaren erantzuna

Gertatutakoaz galdetuta, Udalak azaldu du ez dituztela kartelak “arrazoi politikoengatik edo zentsura instituzionalagatik” kendu, eta are gutxiago “zentsura faxista” ezartzeagatik.

Tokiko erakundearen arabera, kartelak kendu dituzte ez datozelako bat “egungo gobernu-taldearen bide-garbiketaren arloko udal politikarekin”. Izan ere, azpimarratu dutenez, “udal administrazioak ahalik eta gehien zaintzen du herriari buruz eskaintzen den irudia”. Gauzak hala, ez dute “estetikoki onargarritzat” jo “herriko farola guztietan kartelak jartzea”. 

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide