Okondoko EH Bilduk prentsa oharra zabaldu du EAJk proposatutako udal antolakuntzarekin ados ez dagoela adierazteko. Zehazki, koalizioak bi erabaki salatu ditu.
Alde batetik, udalbatzak ez dira legealdi honetan 20:00etan, aurrekoan bezala, baizik eta 15:00etan. Hori dela eta, EH Bilduk uste du herritarren parte hartzea eta kontziliazioa oztopatuko dela. "Neurri honekin lortuko da herritarrek osoko bilkuretara joateri uztea", aipatu dute.
Horrez gain, oposizioko taldeak kritikatu du udal gobernu taldean sail baten ardura duten edo tokiko gobernu batzordean parte hartzen duten zinegotziek dieta kobratuko dutela. Hain zuzen, udal osoko bilkuretan parte hartzeagatik 350 euro jasoko dituzte hilero. Batzordeetan eta ez ohiko udalbatzetan aritzeagatik 50 euro gehiago ordainduko dizkiete, baina hileko 500 euroko muga izango dute.
Zinegotzi arruntei, ordea, 75 euro dagokizkie udalbatzetan parte hartzeagatik. Batzordeetan eta ez ohiko udalbatzetan aritzeagatik 50 euro jasotzen dituzte eta hileko 225 euroko muga dute.
EH Bilduren ustez, dieta horren helburua da alkatearen lan zama arintzea, eta ez daude ados, alkateak liberazio osoa izango baitu urritik aurrera: "Gauza bat edo bestea, baina biak gehiegi iruditzen zaizkigu gure herriarentzat".