Okondoko EH Bilduk oharra plazaratu du azaltzeko bere bultzadari esker Udalak onartu duela etxebizitza birgaitzea alokairu sozialerako. Hain zuzen, atzoko udalbatzan adostu zuten erabakia.
Berez, etxebizitza Irabien kaleko 3. zenbakian dago. 85 metro karratukoa da eta obrak egikaritzeko 80.000 euroko aurrekontua beharko dute. Arabako Foru Aldundiaren dirulaguntza jasotzea espero du tokiko erakundeak, Araba(n) Bizi Bedi programaren deialdian eskaera egin du eta.
Etxebizitzaren arazoari konponbidea bilatzeko beste ekimen bat aurkeztu du aurten EH Bilduk Okondon ere.
“Etxebizitzari soluzioak bilatzea eta erakunde guztietatik erantzunak bilatzea da gure erronka. Zentzu horretan, Okondon abian jarri ditugu hainbat ekimen, adibidez, baserriak bi etxebizitzatan edo gehiagotan zatikatzeko Udal Hirigintza Araudia aldatzeko proposamena edota babestutako baserrien katalogoa. Horrez gain, EH Bilduk Arabako Foru Gobernuaren aurrekontuetan lortutako akordioari esker, diru-laguntza lerro bat zabaldu da eta horrek lagunduko gaitu Okondon proiektua finantzatzeko”, adierazi du Joseba Ruiz EH Bilduko zinegotziak.