2025eko Euskararen Nazioarteko Egunaren testuinguruan antolatutakoak aurkeztu ditu Aiaraldeko Euskalgintza Kontseiluak. Aurtengoan Okondo izango da Aiaraldeko Euskararen Egunaren epizentroa.
Euskalgintza Kontseiluak 2016an Amurrion abiatutako ibilbideari nolabaiteko amaiera emango dio Okondon azaroaren 30ean ospatuko duen jai-egunarekin. “2016an aterkipean abiatu ginen eskualdea euskararen hariarekin jostera. Hamargarrenez ospatuko dugu elkarrekin Euskararen Eguna, etapa baten azken geltokira iritsi gara”, adierazi dute Okondon egindako aurkezpen ekitaldian.
Azaroak 30 Okondora
Hilabeteak daramate Aiaraldeko Euskalgintza Kontseiluko kideek Okondoko herritarrekin azaroaren 30eko egitaraua ontzen. Hain zuzen ere, Okondoko euskaldunak balioan jarri nahi izan dituzte Aiaraldeko Euskararen Egunaren aurkezpenarekin batera: “Mendi eta erreka artean altxorrak gordetzen ditu Okondok: bere eskola txikia, kirikiñausiak, bere ogia, artzaina, txakolina... Eta bere euskaldunak, egunero hauspotuz Okondon euskararen sua bizi-bizi mantentzen dutenak”.
Azaroaren 30ekoa “egitarau betea” dela aldarrikatu dute, Euskararen Eguna eskualde osoko herritarrekin ospatzeko. “Komunitatea batu eta euskara bultzatu, elkartu eta elkar ezagutu, konplizitateak josi eta aktibatu, euskararen sua piztu eta bere inguruan goza dezagun. Hortxe Aiaraldeko Euskararen Egunaren xedea. Ez galdu aukera”, aldarrikatu dute gonbitarekin batera.
Aurreratu dutenez musika, dantza, antzerkia, mendia, jan-edana, adin guztietarako jolasak edota umorea ez dira faltako. Besteak beste, Eingo Taldea eta Jon Ozaeta DJa arduratuko dira egunari erritmoa jartzeaz. Kaitin Allende umoregileak ere ez du herriko hitzordua galduko.
Aiaraldeko Euskalgintza Kontseiluaren web atarian jarri dute eskura Euskararen Egunari lotutako informazio guztia, eta, adierazi dutenez, honezkero eskuragarri daude azaroaren 30eko herri bazkariko tiketak. Txartel hauek 15 eta 8 euroren truke eskuratu daitezke Okondoko liburutegian, Amurrioko AEKn, Laudioko Ilargi tabernan, Arrankudiaga-Zolloko Gizarte Etxean eta Urduñako Alondegian.
Piztu Euskara!
Beroketa lanekin hasteko Okondoko Eskolako kideek proposamena luzatu diete Aiaraldeko gainerako ikastetxeei. Piztu Euskara! lemapean Okondo ezagutzeko eta Euskararen Egunean herrira bertaratzeko gonbita luzatu dute, “elkarrekin euskara piztuko duen murala osatzeko”. Hori ez da, dena den, beroketa lan bakarra. Honezkero abian da Kirikiñorekin batera martxan jarritako Memealdia euskarazko memeen lehiaketaren laugarren edizioa.
