Isilarazitako emakume borrokalarien errealitatea mahaigaineratu nahi dute “Hiru herri borroka bakarra” tailerrean. Poesia eta testigantzak tarteko Sahara, Katalunia eta Euskal Herriko emakumeen aitortu gabeko ekarpen guztia balioan jarri eta ezagutarazi nahi dituzte. Borrokalari antifaxista katalan baten lekukotzak jasoko dituzte, besteak beste.
Tania Miró, Zaskaleari elkarteko kidearen hitzetan, “hausnarketa eta elkar ezagutzarako espazio bat" zabaltzea da egitasmoaren helburua. Emakumeen istorioak bildu nahi dituzte ahalik eta modu zabalenean, izan Saharako aktibisten testigantzak edo “Baserrian erresistentzian bizi izan den andre baten bizipenak”. Zentzu horretan, “emakume borrokalarien historia estalia osatze aldera, parte-hartzaile guztien ekarpenak izango dira ongi etorriak”.
Tailerra Orozkoko Kultur Etxean burutuko da ostiral honetan -otsailak 9- 18:30ean. Tailer mistoa izango da.
Zaskaleari eta Etawasol
Hau ez da Orozkon elkarlanean antolatzen duten lehenengo ekimena. Iaz sei tailer antolatu zituzten kultur emakumeak biltzeko espazioak sortzeko, aniztasuna ardatz. Tailer horietan orotariko gaiak jorratu zituzten: Islama edo maitasun erromantikoa, esate baterako.
Saharako Errepublikaren eguna
Otsailaren 27an ospatzen da Saharar Errepublikaren eguna, aldarrikatua izan zen egunarekin bat eginez. Etawasol elkarteak hainbat ekintza antolatuko ditu egun hori ospatzeko. Ekitaldi nagusienak otsailaren 24an burutuko dituzte Laudion eta Orozkon. Musika emanaldiak, Saharako preso politikoen inguruko hitzaldiak edota Europar Batasunaren eta Marokoren arteko arrantza hitzarmenaren kontrako sinadura bilketa antolatuko dituzte.