Jesus Angel Santa Kruz artzain orozkoarrak jakinarazi du ostiralean txakur batek aberea eraso eta hankan zauritu zuela. Antza, animalia artatzen zuten bitartean, txakurraren jabeak aukera profitatu zuen ihes egiteko.
Orozkoarrak salatu du horrelako gertakariak biderkatu direla: "Sarritan ardiak desagertu egiten dira, zauriturik agertu, abortuak, errenka edo betirako mutilatuak".
Txakur gehiago
Istripuen eta ezbeharren gorakadaren arrazoia da, artzainen ustez, gero eta jende gehiagok jotzen duela mendira txakurrekin. Euren aburuz, hori ez da, edonola ere, arazoa, baizik eta lotu gabe eramaten dituztela."10 txakurretik, 9 doaz solte", ziurtatu du Jesus Angel Santa Kruzek.
Elkarbizitza eta arauak
Artzainek babesten dute mendia edonork erabili dezakeela, baina eskatu diete txakurren jabeei arauak errespetatzea eta animaliak aske ez uztea, kartelek agintzen duten bezala. Kontzientziazioa da, euren ustetan, gakoa.
"Txakurra bera normalean bizi den espaziotik kanpo dago eta jabeek ez dute kontrolatzen. Abeltzainen aldetik argi daukagu mendia denon espazioa dela eta danok disfrutatu behar dugula bertan, baina arauak errespetatuz eta inor kaltetu gabe".
