Erietxe batean jasandako sexu erasoaren berri eman zuen herenegun Orozkoko emakume batek eta atzo izan zen indarkeria matxista gaitzesteko elkarretaratzea Orozkon.
Aiaraldea hedabideak baieztatu duenez, beste bi kasu salatu dituzte polizia etxean geroztik. Ertzaintzak ikerketa abiatu du. Bilboko Virgen Blanca klinikak, bere aldetik, ustezko erasotzailea postutik kendu eta espediente informatiboa zabaldu dio, EITBren arabera.
Erasotuen mezua jendarteari
Orozkoarraren adierazpenei esker zabaldu zen gertatutakoa publikoki. Aiaraldea hedabidearekin harremanetan jarri zen albistea irakurtzerakoan emakume salatzaileetako bat: "Salaketa larria da. Emakume batek lehen pausoa emateak, hitz egiteak, egoera bera bizi izan dugunak indartzen gaitu".
Lekukotza eta bizipenekin bat eginda erabaki zuen Ertzaintzara jotzea: "Isilik geratzeak guztiok mintzen gaitu. Salatzea elkar babestea da". Zentzu horretan, erasotuak espero du kasu hau "Iruñeako Manadaren kasua bezala ezerezean ez geratzea".
Aiaraldeko erasotuak, berriz, sentitutako babesa jarri du mahaigainean: "Elkarretaratzean oso babestuta sentitu nintzen. Ez gaude bakarrik, salatzeak asko balio du. Emakume orori helarazi nahi diot horretarako indarra".
Ildo beretik, mezu argia luzatu dio jendarteari: "Ez isildu mesedez. Indarkeria matxistaren zantzu edo zalantza txikiena baldin baduzu, adierazi edo salatu".