Izaro Blanco pozik dago aurten ere Munduko Kick Boxing Txapelketan arituko delako, baina berriro salatu behar izan du babes falta kirol erakundeen aldetik.
Izan ere, iaz bere gain hartu zituen bidaia eta egonaldia Venezian; eta aurten gauza bera egin beharko du Györ hirira joateko, Hungariara. Txapelketa abuztuaren 23tik irailaren 1era arte izango da.
2018an txapeldunordea izatea lortu zuen eta aurtengoan ere nagusitzea du erronka. Horretarako prestaketa fisiko eta psikologiko aparta gauzatzen ari da: egunero ordubeteko ariketa fisikoa egiten du, teknika jorratzen du 2 orduz; eta astean 3 aldiz -edo posible bazaio gehiagotan- borrokatzen du.
Entrenamendu gehienak Gasteizko Ying Yang gimnasioan egiten ditu, baina etxean ere lan egiten du bere anaiarekin. Horrez gain, zenbait goizetan Bilboko Elite Sportera jotzen du.
Hori dela eta jarduera guztietako laguntza eskertu die senideei, Osncar Nevadori eta Javier Lezcano entrenatzaileari.
Emakumezkoen kirola, bazterrean
Hala ere, 14 urteko borrokalariak oso argi dauka emakumezkoen kirolak ez duela inolako aitorpenik. Euskal Federazioak ez dio diru-laguntzarik eskaini; eta gauza bera gertatu da Espainiakoarekin, nahiz eta erakunde horrek hautatu duen lehiaketan aritzeko.
Iaz munduko txapelketan zilarrezko domina eskuratu ostean, ez zuen inolako aitortzarik izan. "Maria Jose Riendas Contreras Kirol Kontseilu Goreneko presidenteak bidali zidan eskutitza eskertzeko egindakoa" azaldu du orozkoarrak. Egoera hori aintzat hartuta, bere anaia Iker Blancok nabarmendu du edozein laguntza ongi etorria izango dela.
