aiaraldea.eus

[ERREZETAK] Marmitakoa, Alejandro Olabarria eta Josu Respaldizaren eskutik

Erabiltzailearen aurpegia Erredakzioa   Kultura  Orozko

Euskal Herriko marmitako txapelketako lehen saria eskuratu izan dute Orozkoko Alejandro Olabarriak eta Josu Respaldizak. Gastronomia lehiaketa ugaritan hartzen dute parte. Marmitakoa nola prestatu kontatu digute.

[ERREZETAK] Marmitakoa, Alejandro Olabarria eta Josu Respaldizaren eskutik
Josu Respaldiza eta Alejandro Olabarria, euren txokoan. / Aiaraldea.eus | Ikusi handiago | Argazki originala

OSAGAIAK (12 LAGUNENTZAT)

Saldarako:

  • 5 litro ur
  • 2 porru
  • Berakatz buru bat
  • Perrexila eta gatza

Marmitakorako:

  • 2 piper gorri
  • 6 piper berde
  • 2 kilo tipula gorri
  • Kilo bat tipula txuri
  • 3.5 kilo patata
  • Dozena t’erdi piper txorizero
  • Txakolin baso bat
  • 2.5 kilo hegaluze

PRESTAKETA

1) Saltsarako txiki-txiki egin piper mota guztiak (gorriak, berdeak eta txorizeroak) eta tipula. Olioarekin zartaginean frijitu su geldoan; gutxi gorabehera ordu eta erdiz. Behin saltsa su gozotan eginda, puregailutik pasatu eta txakolin edalontzia gehitu.

2) Patatak zuritu eta kraskatu. Behin zatituta izanda, aurrez prestatutako saltsa lapikoan sartu, eta patatak 15 minutuz sueztitu.

3) Salda prestatu. Horretarako 5 litro ur egosten jarri eltze batean, arrain zuriarekin eta hegaluzearen buruarekin. Horrez gain, porrua, berakatz burua eta perrexila bota saldari.

4) Salda irakiten hastean gatz eskukada bat bota. 25 minutu igaro ostean, sua itzali eta eltzeko piezak kendu (arrain hezurrak barne). Alegia, ur-salda zaporeduna bereizi, patata eta saltsarekin dugun eltzeari batzeko.

5) Hegaluzea zatitu (pieza marroiak kenduta) eta 5 minutuz marmitako eltzean egosi (jan baino 15 minutu lehenago).

6) 10 bat minutuz pausatu marmitakoa sutik kanpo, hegaluzea berezko berotasunarekin kozinatu dadin.

7) Marmitakoak oliorik izango balu kendu.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa