Poesia, musika eta dantzarekin gogoratu zuten Blas de Oterok Orozkon utzitako arrastoa, larunbatean. Batasuna dantza taldeak antolatu zuen"omenaldi ibiltaria", idazlearen heriotzaren 40. urteurrena medio.
Bost geldialdi egin zituzten artistarentzat esanguratsuak izan ziren tokietan: Muñozen etxean, Txoperan, San Anton iturrian, frontoian eta Zubiaur plazan. Muñoz etxea uda bertan igarotzen zuelako aukeratu zuten. Txopera, berriz, poema baten izenburu eta muina delako.
Azaldu zutenez, frontoira ere sarritan joaten zen "giharrak luzatzera". Blas de Oterok, bere lanetan, Ibarra edota Murueta auzoetako erromeriak ere aipatzen ditu; edota Luiaondo, Laudio edota Baranbio herriak. Aiaraldeaz gain, euskal hizkuntzari ere egin zion keinu, Orozko eta Durango haranetakoa zela aitortuz Euskeraz egin dezagun poeman.
Guzti horiek eta gehiago kontatu zituzten ikuskizunez beteriko ekitaldi ibiltarian. Herriko aurpegi, ahots eta ezagun asko bildu zituen zitak. Horien artean, Agurtzane Intxaurraga antzezlea edota Rafa Muntion irrati esatari ohia. Juanjo Respaldiza bertsolariak ere hartu zuen parte.
Musika instrumentu ugari entzuteko parada egon zen: biolina, biolontxeloa, txirula, kitarra... Baita poeten errezitaldiak ere, Julio Flor eta Jose Fernandez de la Sotarena, kasu.
Halaber, tokiko eragile eta herritar andana inplikatu ziren: Agate Deuna abesbatza, Orozkoko eskola, bertso eskola, Josu Amundarain eta Aitzol Basaldua txalapartariak... Hain zuzen, frontoia egokitu zitzaien azken hiruei agertoki gisa. Juantxu Uribarren eta Iker Iriondo pilotariek partida azkarra jokatu bitartean, txalapartaren hotsek lagundu zuten Orozkoko haurren Hitzik ez olerkia.
Une berezi ugari pilatu zituen omenaldiak. Txoperan, esaterako, arte diziplina ugari nahastu zituzten: Rafa Muntionek eta Agurtzane Intxaurragak eskainitako olerkiak, Maialen Bilbaoren dantza, eta Izaskun Villaverderen txirula soinua, besteak beste.
Gune guztietan Blas de Oteroren poemak iltzatu zituzten egurrezko xaflatan. San Anton iturriaren bueltan, akordeoi doinu artean irakurri zituzten Santa Marina eta "Harana" hizpide dituen sormen lanak. Euskaraz sortuak batzuk, gazteleraz besteak.
Zubiaur plazan bukatu zen ikuskizuna, "Orozko" poemaren irakurketarekin eta Lucia Socamen kantaldiarekin.
Urtebeteko lanaren emaitza
Pedro Martin Olabarria Batasuna dantza taldeko kidea da. "Orozkorekin zuen harremana herriari azaltzea izan da helburua. Txikitatik jolastu du hemengo erreketan, frontoian.... Orozkoar guztiok bezala", adierazi dio Aiaraldea hedabideari.
Urtebete igaro dute emanaldia prestatzen: "Iazko abenduan hasi ginen ideiari bueltak ematen. Oso ikuskizun landua izan da. Eskerrak eman behar dizkiegu antolakuntzan lagundu gaituzten guztiei, eta baita hurbildutako pertsonei ere, euren presentzia aktiboagatik".
