Olgetan elkarteak sustatu du ekimena, herriko paleta jokalariei urtean zehar norgehiagoka gehiago eskaintzeko. Andoni Olabarriaren esanetan, iaz izan zuten ideia: “Nesken paleta modalitateko partidak eta denboraldia laburrak dira. Urriaren amaiera aldera hasten dira, eta martxoan bukatu. Hutsune handia geratzen da txapelketa gabe federatuentzat”. Horregatik, otsailean herriko torneoa prestatzeko lanean hasi ziren: “Inguruko klubekin hitz egin genuen, klub bakoitzak bere torneo pribatuak antolatzea zulo horiek estaltzeko”. Alabaina, daten hautaketan zailtasunak izan dituzte, eta maiatzean egiteko asmoa zuten dinamika udazkenera atzeratu behar izan dute, “beste klubek data hori nahi zutelako”. Hala ere, elkarlanean osatu dute egutegia, elkarte bakoitzak garai bat aukeratuta.
Txapelketak abian
Hala, irailetik txapelketa ofizialak hasi arteko epea beteko dute Orozkon, “badakigu jendea ez dagoela nahi bezain entrenatuta goiz delako”. Horregatik, pizgarri gisa balio lezakeelakoan daude. Olgetanekoekin batera, Sopelako Kurene taldekoak, Gasteizko Adurzakoak eta Larrabetzuko Olarretakoak arituko dira. “Gonbidapenak bidali ditugu, eta dagoeneko zehaztuta daude bikoteak”. Ez da, ordea, batera prestatzen duten ekimen bakarra; Olgetanek, esaterako, Sopelako Hiru Erregeen Kopan hartzen du parte.
Sei bikote lehiatuko dira guztira eta liga formatuan jokatuko dute. Norgehiagoka hasi da dagoeneko eta urriaren 26ra arte luzatuko da
Orotara, sei bikote izango dira, eta liga formatuan jokatuko dute, “denek guztien kontra”. Bost jardunalditan bereizi dituzte partidak, bariku eta zapatuetan. “Txapelketa urriaren 26an bukatuko da. Festibal bakoitzean sei bikotek jolastuko dute egun berean”. Kiroldegian elkartuko dira horretarako, “gomazko pilotak abiadura handia du eta ezin da herriko frontoian egin”. Edozelan ere, jende guztia gonbidatu dute ikustera: “Kartel propioak egingo ditugu egun bakoitzerako, eta sare sozialetan ere zabalduko du. Ahalik eta hedapen handiena izatea nahi dugu jendea etortzeko”.
Aurreratu dutenez, berezia izango amaiera eguna, urriaren 26a. Batetik, finalerdiak eta finalak jokatuko dira. Bestetik, larruzko paleta partida bat antolatuko dute. Gainera, Orozkoko Museoak bezperan Iñigo Gallagaren hitzaldia jasoko du, frontoiaren historiaren inguruan, “asteburu polita izango da”.
Harrobiaren egoera
Eskualdeko pala jokalarien harrobia zelan dagoen galdetuta, Orozkon oso pozik daude, Olabarriak aitortu duenez: “Momentu honetan frontoia txiki geratu zaigu. Aurtengo taldeak egitean beste 7-8 pala jokalari batu dira, pozik gaude baina arazo bihurtu da. Lehen txikiak zirenak nagusien kategoriara pasa dira, eta malabareak egin behar izan ditugu guztiak onartzeko eta entrenamenduak luzatzeko”. Izan ere, plazako frontoia eguraldiak baldintzatzen du, eta ezin dute baliatu, “eskaera eginda dago”.
