Orozkoko autonomo eta enpresa txikiek herriko egoera ekonomikoa leuntzen laguntzeko plan ekonomikoa eskatu diote udalari ohar baten bidez. Epe laburreko likidezia arazoak konpontzea dute helburu, “gure jarduerarekin jarraitu ezin dugunoi edo diru-sarrerak murriztu ditugunoi bideratutako laguntza zuzenen bidez”.
Dena den, beste hainbat neurri ere eskatu dizkiote udalari: “Udal-zergen ordainketak deuseztatzea, estrategia serioak burutzea osasun-krisiak gehien eragindako sektoreak suspertzeko eta krisi garaian enplegua babesteko politikak eratzea”. Era berean, babesa behar dutela adierazi dute, hainbat negozio ixteko arriskuan daudela nabarmenduta.
Estatuko eta aldundietako laguntzak urriak direla eta berandu iristen ari direla ere kritikatu dute, eta adierazi dute horrek sortzen duela udalera jotzeko beharra, “herritarren arazoetara hurbilketa errealago baten zain”. Hala ere, nahi duten erantzuna ez ematea leporatu diote udal-gobernuari eta gehitu dute momentura arteko proposamenak motz geratu direla.
Argipen bezala, zehaztu dute enpresa guztiak ez daudela egoera berean, nahiz eta haien arteko elkartasuna adierazi: “Badaude inolako laguntzarik behar ez dutenak eta baita laguntza ekonomikoa edota bestelako babesa behar dutenak ere, baina denok dakigu kasu hauetan elkartasuna funtsezkoa dela”.