Orozkoko osakidetzako beharginek egoeraren gogoeta eraman zuten udalbatzara: "Gure helburua beti izan da jendea babestea, batez ere zaurgarrienak. Etengabe egin behar izan dira etxeetara bisitak, jarraipen espezifikoak eta abar".
Idoia Camachok irakurri zuen adierazpena, eta orozkoarren jarrera txalotu zuten osasun langileek: "Pertsona askok ahalegin handia egin dute. Iratxe Pikazak egunero eraman ditu gure jantziak garbitzeko tintategira, eta garaiz itzuli dizkigu beti. Udaleko brigadako langileek, beharren egon gabe ere, azkar jokatu dute guri gertatu zaigun edozein matxuraren aurrean".
Iñaki Altunaren interesa ere eskertu zuten, baita alkatearen inplikazioa ere, "zentroko eta orozkoarren egoera jakiteko egunero egindako deiengatik". Boluntarioen sarea ere izan zuten gogoan, laguntza behar zutenekin elkarlanean aritzeagatik. Ildo beretik, Martin Valienteren ekarpena azpimarratu zuten, 3D inprimagailuarekin egindako pantailengatik.
Udalaren, haur eskolaren eta norbanakoen laguntza ere eskertu zuten, beharrezko materiala eskura jartzeagatik: musukoak, desinfektatzaileak eta beste.
"Oraindik ezin dugu gaixotasun hau sendatu. Arduratsuak eta kontzienteak izaten jarraitu behar duzue kutsatzeko arrisku handiena dutenei kalte ez egiteko. Bizitzak jokoan daude", esanez amaitu zuten hitzartzea.