Askorentzat bezala, urte gorabeheratsua izan da Jentilzuloko Kulturgunearentzat ere. Herriko jaiak ospatu ez izanak egoera ekonomiko larrian utzi du espazioa, bertako irabazi guztiak lokalaren gastuei aurre egiteko bideratzen baitzituzten. Oharra kaleratu dute Orozko gune horretako kideek bizi duten egoera salatzeko.
Udalaren erantzuna
Ikasturte berria abiatzearekin batera, “segurtasun-neurri guztiak errespetatuz”, ekintzak berrartzeko apustua egin dute kulturgunean. Udalak, ordea, ez die horretarako baimenik eman, espazioa “gazte lonja” bat dela argudiatuta. Eusko Jaurlaritzak gazte lokalak ixtea ezarri zuen COVID-19ari aurre egiteko neurrien artean. Udaletik "osasun-larrialdi egoera" dagoela nabarmendu dute, eta gaineratu dute "orozkoar guztien erantzukizunean konfiantza" dutela, "koronabirusa herrian ez zabaltzeko".
Jentiluzoko kideek, aldiz, kulturgunea gazte lonja bat ez dela defendatu dute: “Jentilzulo herriarena da, auzolana da, euskara da, kultura da, feminismoa da”.
“Egoera larria” dela azpimarratu eta herritar guztien bultzada eskatu dute espazioa bizirik mantentzeko. Hala, datorren abenduaren 10ean, asanblada informatiboa egingo dute Donibane Aretoan, 19:00etan. Bertan, kulturgunearen egoera zein den azalduko diete herritar guztiei eta eta aurrera begirako urratsak aurkeztuko dituzte.
Jentilzulok bost urte
2015ean zabaldu zituen ateak Orozkoko Jentilzulo Kulturguneak, udal gobernuak gazte asanbladak kudeatzen zuen Gaztetxea zigilatu eta itxi ostean. Bost urte hauetan, autogestioa oinarri, ekintza eta jarduera ugari antolatu dituzte bertan.