Orozkoko EH Bilduk desadostasun mezua zabaldu du prentsa ohar baten bidez, udal gobernu taldeak prestatutako diru-laguntzen deialdiaren harira. Horren bidez, pandemiak sortutako kalte ekonomikoak arindu nahi ditu tokiko gobernuak, baina koalizioak uste du ez direla bitarteko nahiko eskaini: "Adiek, kaltetutako sektoreak entzun gabe eta kontuan hartu gabe eta inolako diagnostikorik egin gabe jarri ditu laguntzak martxan. (...) neurria ez dago tokiko merkataritzako sektore guztiak laguntzera bideratua. Izan ere, ez zaie udal-laguntzarik eskatzeko aukerarik ematen beharra duten merkatari guztiei".
Oposizioko taldearen ustez, Orozkoko negozio guztiek ez dute aukerarik izango babes ekonomikoa eskuratzeko eta, hori zuzentzeko, tokiko merkatarien egoerari buruzko diagnosia egitea eskatu du.
Horrez gain, EH Bilduk leporatu dio gobernu taldeari diru gutxiago inbertitzea Orozkoko ehun ekonomikoan: "tokiko merkatariak laguntzeko, aurreko urtean baino 15.000 euro gutxiago inbertitu dira eta urtebete beranduago martxan jarri gabe jarraitzen duen kontsumo-bonuen 10.000 euroak ostalaritza sektoreko autonomo eta enpresentzako aparteko laguntzara bideratu ditu udal gobernuak".
Bestalde, koalizioak exijitu dio udalari Martxoaren 8an onartutako baldintza txertatzea jarduera honetan. Hau da, genero ikuspegia aintzat hartzea diru-laguntzen deialdian.
