Izaro Blanco Montenegroko Budva hirian egongo da 10 egunetan Europako Kick Boxing Light Txapelketan parte hartzeko. WAKO elkarteak antolatzen du lehiaketa, eta orozkoarrak motibazio handiarekin hartu du erronka, nahiz eta 20 egun lehenago jakinarazi zioten hitzordua.
"2018an munduko bigarren izan nintzen, eta 2019an Europako bigarrena ere. Nire helburua da garaitzea"
Bihar hasiko duen egonaldia azaroaren 15ean amaituko da, eta txapelketa irabaztea izango du xede: "2018an munduko bigarren izan nintzen, eta 2019an Europako bigarrena ere. Nire helburua da garaitzea".
Kirolariak Aiaraldea Hedabideari adierazi dionez, "topera" dago; eta pandemian ez dio utzi entrenatzeari. Alegia, itxialdiak eta osasun larrialdiak lagundu egin dute krirolaria jabetzen zein garrantzitsua den Kick Boxinga bere bizitzan: "Mentalki hobetuta, faltan bota dut kirola, nahiz eta egunero entrenatu dudan nire nebarekin. Hala ere, tartea izan dut hausnartzeko eta pentsatzeko zer nolako garrantzia duen kirolak niretzat".
Dena den, azken urtea gorabeheratsua izan da borrokalariarentzat: "Elite Sport gimnasioan entrenatzen nuen eta hori itxi ostean, Laudiora etorri nintzen, Hajime Klubera. Laudion hiru egunez entrenatzen dut astero, eta beste bi egunetan Portugaletera noa".