Asteartean -otsailak 8- Orozkon egin zuten Udal Osoko Bilkuran onartu zuten Artiacheko langileen aldeko mozioa. Testua EH Bildu eta EAJ udal taldeen babesari esker atera zen aurrera, Adie abstenitu egin zen.
Testua onartuta, "eskubideen murrizketa eta soldata mailaketa bikoitza" jasotzen dituen lan-hitzarmena ezartzeko Artiach enpresak egindako presioak arbuiatu zituen Udalbatzak, eta zuzendaritzaren asmoen aurrean desadostasuna erakutsi zuen. Era berean, Artiachek Orozkoko lantegian inbertsioak ez egiteko mahai-gainean jarritako mehatxua ere deitoratu zuten udal ordezkariek, fabrikaren etorkizuna arriskuan ez jartzeko konpromisoa eskatuz.
Horrez gain, Artiach eta Ibarrako Madres Mercedarias egoitzako langileek biharko deitutako mobilizazioetan parte hartzeko deia luzatu du EH Bilduk.
Adieren abstentzioa
Udal gobernua osatzen duen Adie talde politikoa abstenitu egin zen Artiacheko langileen aldeko bozketan, testu itxia aurkeztu zela argudiatuta. "Greba hastean Artiacheko langileek Orozkoko Udalean ordezkatuta dauden hiru alderdi politikoekin bildu ziren eta mozio bat aurkezteko asmoaren berri eman zuten. Plenoaren egunera arte, Adiek ez du testu adostu bat adosteko proposamenik egin" azaldu du EH Bilduk, Adiek abstentzioaren alde egiteko nahikoa arrazoi aurkeztu ez dituela argudiatuz.
Artiacheko langileek urtarrilaren 24an aurkeztu zuten Udalbatzan eztabaidatzeko mozioa, baina Pedro Mari Intxaurraga alkateak gai-ordenan ez sartzea erabaki zuela azaldu du EH Bilduk. Hori dela eta koalizio abertzaleak modu urgentean aurkeztu zuen testua, otsaileko udalbatzan eztabaidatua eta onartua izan zedin.