Mikel Lazkano gazte orozkoarrak London Fashion Week jaialdian parte hartuko du gaur 21:00etatik aurrera. Munduko erreferente den ekimen horretan, bere sormen lanak ikusiko dira eta interesdunek hemen jarraitu dezakete ekitaldia.
Hain zuzen, 'Lazkano' markaren sortzaileak zenbait arropa txertatuko ditu London College of Fashion akademiako ikasle gisa. Antolatzaileek horrela aitortzen dute erakunde horrek duen izaera aitzindaria balio eta sortzaile berriak trebatzeko eta azaleratzeko.
Iaz bertan behera geratu ostean, London Fashion Week-ak eredu fisikoa eta birtuala uztartu ditu eta, horregatik, streaming bidez ikusiko da desfilea. Gaur izan da irekiera ofiziala, nahiz eta atzo egitarauaren zati bat egin zuten. Otsailaren 22an, asteartean, amaituko da aurtengo edizioa.
Mikel Lazkano duela bost urte joan zen Cityra moda eta diseinu ikasketekin jarraitzeko eta bere sorkuntza diskurtsoan sakontzera. Izan ere, orozkoarrak estilo zehatza proposatzen du: "Linea sinpleak eta kolore neutroak, denboran iraun dezaten, eta gizontasun-eredu samurra, jakituna, ingurumenaren hauskortasuna errespetatu eta kontsumo arduratsua sustatzen duena".
Zentzu horretan, Lazkanok bere ideiak Londresen mamitu arren, Bizkaian ekoizten ditu, "tokiko kalitatea hobezina" dela uste baitu.
