Artiacheko langile bat hil zen larunbatean, lanetik etxera itzultzen ari zela

Gaueko txandatik atera ostean izan zuen istripua langileak. / Aiaraldea.eus

LAB, ELA eta ESK sindikatuek elkarretaratzea egingo dute 13:00etatik 15:00etara Orozkoko fabrikaren aurrean. 

Artiacheko langile bat, 36 urteko emakumea, hil zen larunbatean Zaratamon, in itinere istripu batean, lanetik etxera itzultzen ari zela. Hala jakinarazi du LABek ohar baten bidez. 

Sindikatuak elkartasuna adierazi nahi izan die hildakoaren senide, langun eta lankideei, eta honakoa gaineratu du: “Lanetik etxera zihoala gertatutako istripua izanik, Lan Ikuskaritzak ez du bere horretan ikerketarik irekiko eta trafiko istripu arrunta balitz bezala kudeatuko dutelakoan gaude. Baina LAB sindikatutik argi utzi nahi dugu in itinere istripuak, lan istripuak izaki, kontrolagarriak direla neurri handi batean”.

LABek adierazi du datu ofizialek “bistan” uzten dutela “Euskal Herriko lan istripu hilgarriaetako asko in itinere direla”.  Ildo horretan, sindikatuak nabarmendu du larunbateko istripua 6:00etan gertatu zela, gaueko txanda amaitu berri, eta kasu horietan nekea “arrisku faktore garrantzitsua” dela.

“Ba al dago arrisku faktore garrantzitsu hau enpresaren arrisku ebaluaketan identifikatua? Integratu al da neurri prebentiborik hau kontrolatzeko? Ba al du enpresak mugikortasun planik?”, galdetu du sindikatuak, eta gaineratu du langileak behin behineko kontratua zuela. 

Gauzak hala, LABen ustez, Osalanek eta Lan Ikuskaritzak “betebehar garrantzitsua” dute in itinere arriskuetan. “Administrazioak berak in itinere istripuak ez baditu ikertzen, enpresek ere ez dute hauek kontrolatzeko neurririk hartuko”.

Horregatik, mota horretako ezbeharrak kontrolatzeko kanpaina abiatzea exijitu diote Osalani, mugikortasun planak integratzearekin batera. “LAB sindikatuak modu zorrotzean jarraituko ditu egoera guztiak eta beharrezko ekintzak eramango ditu aurrera patronalak berea den ardura bete dezan”. 

Elkarretaratzea

Lan heriotza salatzeko elkarretaratzea egingo dute LABek, ELAk eta ESK-k bihar -apirilak 26- Orozkoko lantegiaren aurrean, 13:00etatik 15:00etara. 

Urteko lehen lan heriotza eskualdean

Aurten Euskal Herrian jazotako 21. lan heriotza izan da Artiacheko langilearena, eta Aiaraldeko lehena. Iaz bi langile hil ziren eskualdean beharrean ari zirela. 2020an, aldiz, 9 izan ziren guztira. 

Erlazionatuak

Etenik gabeko odolustea

Aiaraldea

Garraiolari bat Orozkon eta eraikuntza enpresa bateko langilea Amurrion izan dira 2021ean Aiaraldea astindu duten lan heriotzak. 2020an zazpi izan ...

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide