4.200 euro ordaindu beharko dizkie Fundacion Aliadosek jai egunetan lan egitera behartu zituen hamalau langileri, hau da, 300 euro bakoitzari, sortutako kalteengatik. Horrela, Madres Mercedarias zentroko langileek epaiketa irabazi diote kudeatzaileei, lan baldintzak aldebakartasunez aldatzeagatik.
Langileen kolektiboak espero du garaipen horren eskutik fundazioak "amaiera emango diela Ibarrako zentroko langile guztien aurka egiten dituen etengabeko gehiegikeria eta erasoei".
Lan hitzarmen duina lortzeko abiatutako borrokaldiaren erdian iritsi da epaia eta, zentzu horretan, epaileek beharginen gogoak indarberritu dituzte lanuzteak eta protestak egiten jarraitzeko. Gauzak horrela, Ibarran kokatuta dagoen zaintzarako zentroko langileek honakoa ohartarazi dute: "Gure greba egunekin jarraituko dugula eta mobilizatu egingo garela adierazi nahi dugu, gurea dena itzultzea lortu arte".
Bide batez, aniztasun funtzionala duten pertsonak zaintzen dituzten profesionalek berriro exijitu diote Bizkaiko Foru Aldundiari modu arduratsuan inplikatzea lan gatazkan, ahalik eta lasterren eta hoberen amaitzeko.
Ez da hori Orozkoko langileek irabazi duten lehenengo epaiketa. Urtarrilean Artiach enpresako beharginek lortu zuten enpresa zigortzea greba eskubidea urratu eta gero.