Jesuri mendiaren inguruan Green Capital Development enpresak eraiki nahi duen Larragorri parke eolikoaren aurka azaldu da Orozkoko Udala. Proiektua behin-behinean geratzeko eskatzen zuen mozioa aurkeztu zuen Adie udal taldeak ekainaren 22ko Udal Osoko Bilkuran, eta EH Bilduren babesa jaso zuen testuak. Gauzak horrela, tokiko erakundeak eskaera zuzena egin dio Eusko Jaurlaritzari: oraindik hastapenetan dagoen proiektua etetea.
Udal Gobernuak orozkoarren iritzia jasotzeko konpromisoa adierazi du, 2011an egin bezala. Urte horretan Guascor S.A. enpresak 8 aerosorgailu jarri nahi zituen energia elektrikoa sortzeko. Herritarren mobilizazioak eta kaltetutako Laudio, Amurrio eta Orozkoko Udalen aurkakotasunak, ordea, proiektua gelditzea lortu zuten. Oraingo honetan ere, ateak zabaldu dizkiote bide hori jorratzeari.
Bost aerosorgailu Jesurin
Eusko Jaurlaritzaren onarpena jaso ostean, Green Capital Development enpresak abian jarri du Jesurin bost aerosorgailu instalatzeko prozesua. Duela hilabete aurkeztu zuten lehenengo ingurumen-inpaktu azterketaren zirriborroa, eta tokiko erakundeei dagokie orain txostenaren gaineko aurretiazko kontsultak egitea.
Txostenak aurreratu duenez, 200 metroko altuera izango duten aerosorgailuak jarriko dituzte, eta bost hilabeteko epean aurreikusi dute instalazio guztia eraikitzea, behin proiektuak behin betiko onarpena jasota.