Capital Energy - Green Capital Development enpresak bilera egin du gaur goizean Orozkoko Udalarekin Jesuri mendiaren inguruan eraiki nahi duen parke eolikoaren nondik norakoak aurkezteko. Enpresak berak deitu zuen bilera tokiko gobernuarekin. Udalak, bere aldetik, bileran parte hartzeko eta enpresak esan beharrekoak entzuteko prestutasuna aurkeztu badu ere, proiektuarekiko bere aurkakotasuna adierazi egin du honezkero.
Bigarren bilera bat ere egin dute gaurkoan Capital Energy enpresako kideek. Orozkoko Udalarekin bilkura amaitu bezain laster Laudiora jo dute bertako bertako udal-gobernuarekin gai berdina lantzeko asmoz.
Protesta bileraren atarian
Aiaraldeko Mendiak Bizirik plataformak elkarretaratzea egin du Orozkoko Zubiaur plazan, enpresa eta Udalaren arteko bileraren atarian. Capital Energy enpresak trantsizio energetikotzat deitu duena "negozio hutsa" dela salatu dute udaletxearen aurrean bildutakoek, eta mendien industrializazioa gelditzea eskatu dute. Plataformako kideek Aiaraldea Komunikabideari adierazi diotenez, tentsio une batzuk bizi izan dira, enpresako ordezkariak bileratik atera direnean.
Bien bitartean, Capital Energy enpresak tematuta jarraitzen du Euskal Autonomia Erkidegoan eraiki nahi dituen zazpi zentral eolikoen proiektuak aurrera ateratzen, Jesuri mendi inguruan eraiki nahi duten Larragorri parke eolikoa tartean. Ingurumen inpaktu azterketa ari dira osatzen une honetan Eusko Jaurlaritzako Ekonomia Garapen, Jasangarritasun eta Ingurumen Sailak oinarrizko txostenari bide eman ostean.
Horren aurrean, plataforma ekologistako kideek proiektuaren aurkako kexak aurkezteari ekin diote eskualdeko udaletxeetan. Blog bat zabaldu dute ere Aiaraldean proiektatuta dauden zentral eolikoen inguruko informazioa zabaltzeko. Ekarpena egin nahi duen herritar orok aiaraldekomendiakbizirik@gmail.com helbidera mezu bat bidali dezake, edota eskualdeko kirol edota kultura ekintzetan jarriko dituzten informazio postuetara hurbildu. Besteak beste, Arakaldoko Euskararen egunean, Saratxoko mendi martxan, Amurrioko krosean edota Orozkoko Santa Luzia egunean egongo dira plataformako kideak informazioa banatzen.