Blas de Oteroren poemak eta bizitza izango ditu ardatz Orozkoko Museoaren urte amaierako programazioak. Urtarrilaren 3ra arte, Begirada geratzen zait erakusketa egongo da ikusgai. Idazlearen poesian inspiratutako Euskal Herriko eta Kataluniako 23 lanez osatutako bilduma da. Hori bisitatu nahi izanez gero, asteartetik igandera eta jai egunetan 10:00etatik 14:00etara irekitzen ditu ateak museoak; ostiraletan eta larunbatetan, gainera, 16:00etatik 18:00ak arte ere sartu daiteke.
Erakusketarekin batera, flamenkoa eta Blas de Oteroren poesia nahasten dituen Digo Vivir dokumentala proiektatuko du Orozkoko Museoak, eta bere zuzendariak, Jose Fernandez de la Sotak, hitzaldia eskainiko du. Abenduaren 16an izango da ekintza, 18:30etik aurrera, eta sarrera librea izango da eserlekuak bete arte.
Ez da Blas de Oteroren omenez Orozkon antolatu duten lehenengo ekimena. 2019ko irailean omenaldia egin zioten bere heriotzaren 40. urterurrena zela eta, Orozkoko Batasuna Taldeak eta Blas de Otero Fundazioak sustatuta. Besteak beste, artistarentzat adierazgarriak izan ziren Zubiaurreko bost puntu zeharkatu zituzten: Muñoz etxea, Txopera, San Anton iturria, frontoia eta plaza. Blas de Oteroren amaren familiaren paisaia da Orozko, bere amona Pepita Sagarminagarena.