Gaur abiatu dute Madres Mercedariaseko langileek 7 eguneko greba, Ibarrako zentroaren itxiera mehatxuaren aurka. Ordubeteko elkarretaratzea egin dute Orozkoko auzo horretan, 14:30etatik 15:30etara. Bihar ere toki eta ordu berean egingo dute protesta.
Asteazkenean, aldiz, Bilbora joango dira, mobilizazioa egingo baitute bertan goizeko hamarretan, EDE Fundazioaren egoitzatik Moyuara. Ez dira bakarrik egongo, eurekin batera mobilizatuko baitira aniztasun funtzionala jorratzen duten Bizkaiko beste zentro batzuetako beharginak ere: Apnabi, Gaude eta Gorabide, hain zuzen. "Aniztasun funtzionaleko enpresa guztiak gaude egoera berean, lan hitzarmena izoztuta eta lan prekarietatearekin". Hala azaldu zuen Olaia Armendariz Azcoagak Aiaraldea Komunikabidearekin iragan ostiralean eginiko elkarrizketan:
Bilboko manifestazioaren ostean, Orozkora itzuliko dira grebalariak, elkarretaratzea egiteko aurreko bi egunetako toki eta ordu berean.
Ostegunean ere errepikatu dute hitzordu hori, baina lehenago Laudion arituko dira, merkatu eguna dela probestuta. Kotxe karabana egingo dute Ibarratik bertaraino, 11:00etan. Ondoren, elkarretaratzea egingo dute azokan bertan, 12:00etatik 13:00etara.
Ostiralean Bilbora itzuliko dira goizean, Bizkaiko Foru Aldundiak Gran Vian duen egoitzaren aurrean protesta egiteko 11:00etatik 12:00etara. Arratsaldean, ordea, 'SOS Aiaraldea' lemapean Laudion egingo den mobilizaziora batuko dira, Glavista eta Talleres Abasoloko beharginekin batera.
Asteburuko plana
Asteburuan, aldiz, Orozkon garatuko dute protesta dinamika. Larunbatean Ibarrako zentroan bilduko dira, 12:00etatik 15:30etara. Igandean, aldiz, Zubiaur plazan egingo dute elkarretaratzea, 13:00etatik 14:00etara.
Argazkiak: Samuel Pasandin Sanchez