Bertso eskola berriz martxan jarri nahi dute Potolari elkarteko kideek. Berez, duela 15 urte baino gehiago sortu zuten eskola, eta orduan ekin zioten lehen klaseak emateari, baina dinamikak ez du jarraipenik izan.
Egun, Orozkoko Eskolan ematen dute bertsolaritza, Lehen Hezkuntzako eskola-arautuaren barruan, eta Bizkaiko Bertsozale Elkarteko kideak arduratzen dira saio horiek dinamizatzeaz, hasiera batean Potolariko kideek sustatu zituzten arren. “Beti izan dugun arantza hori: bertso eskolari jarraipenik eman ez izana gazteen artean, klaseetatik kanpo”, aitortu dute Orozkoko elkarteko kideek. Euren ustez, “etenaldia” ematen da bertsolaritzaren transmisioan haurrak DBHra igaro eta Laudion ikastera igarotzen direnean.
DBHra igarotzen diren gazteen bertsolaritzarekin harremana mantentzea izango da eskolaren xede nagusia.
Horregatik nahi dute bertso eskola osatu eskolaz kanpoko jarduera gisa, herriko gazteek ere harremana mantendu dezaten kultura horrekin. Lehen Hezkuntza 6. mailako eta DBHko ikasleei bideratutako eskola izango da, eta klaseak ostiral arratsaldetan eskaintzea aurreikusi dute. Izena emateko potolaribertso@gmail.com helbidera idatzi behar da, parte hartzailearen izen-abizena, adina eta harremanetarako telefono bat zehaztuta. Iragarri dutenez, momentuz ez du inork izena eman eskolan, baina jendea lotzeko ahalegina egingo dute, Orozko “herri bertsozalea” dela uste baitute.
Urteko dinamika
Potolari bertso eskolak hainbat jarduera egiten ditu urtean zehar Orozkon bertsolaritza sustatzeko. San Joanetan bertso kalejira egiten dute eta bertso saioa, aldiz, sanantolinetan. Udazkenean, ordea, bertso bazkaria egiten dute urtero, sona handiko bertsolarien parte hartzearekin.