Ander Ganzabal txirrindulari orozkoarraren denboraldi bikainak ez du etenik. Euskalduna Txapelketako azken bi lasterketetan lortutako markek sailkapenaren lehen postuan jarri dute Laboral Kutxa Teameko kidea, eta abantaila handiarekin berrekingo dio txapelketari hasi berri den hiru asteko atsedenaldiaren ostean.
Gorlako igoeran txapeldun
Martxoaren 24an Bergarako XLIX. Gorlako Igoera lehiatu zen, Euskalduna Txapelketaren barruan. Ezusteko handirik gabe hogei txirrindulariz osatutako tropela iritsi zen azken igoerara, eta, bertan, helmugarako bidea bakarrik hartu zuen Ganzabalek, bigarren sailkatuari zortzi segundoko aldea aterata. Garaipen ikusgarria sinatu zuen orozkoarrak, Laboral Kutxa Team taldeak egindako talde lan onari esker.
Amorebietan hirugarren
Igandean jokatutako Amorebietako Udaberria Klasikoa izan zen Euskalduna Txapelketako azken lasterketa, hiru asteko atsedenaldiaren aurretik. Lasterketa bizia izan zen, ihesaldi saiakera ugarirekin. Ander Ganzabalek ondo eutsi zion lehiari eta amaierako sprintean sartzea lortu zuen. Helmuga lerroa hirugarren postuan gurutzatu zuen, txapelketan duen lidergoa aldarrikatuz.