Jo ta ke entrenatzen dabil Izaro Blanco orozkoarra udan, abuztuaren 21etik 26ra bitartean Polonian egongo baita EHU ordezkatzen Europako Unibertsitateen arteko Txapelketan. Hain zuzen, Blanco izango da euskal unibertsitatea ordezkatuko duen lehen kirolaria kick boxing-en. Bere anaiaren laguntza izango du Poloniako erronkan.
Orozkoarraren anbizioa ez da txikia, irabazteko asmoa baitauka eta horregatik gogor entrenatzen ari da. Gasteizko bere taldearekin egin du lehenik eta behin, orain Laudion Basque Fight Team-ekin dabil eta laster Ponferradara joko du Diego Vazquezekin prestaketa amaitzeko.
Pasa den astean Espainiako Selekzioak deitu zuen Lisboan lehiatzeko eta Blancok argi dauka trantsizio une batean dagoela: "Orain arte tatamian borrokatu naiz eta jadanik ringean egiten dut. Horrez gain, boxeoan hasi naiz, baina soilik kick boxingean hobetzeko, bigarren mailan jartzen dut".
Etorkizunean, Joko Olinpikoak?
Izaro Blanco oso gaztea da, baina jadanik sekulako palmaresa pilatu du eta badaki zer den munduko txapelduna izatea.
Horregatik espero du Joko Olinpikoetan parte hartzeko aukera agertzea etorkizunean. Izan ere, duela bi urte saiatu ziren kick boxinga kirol olinpikoa bilakatzen, baina ez zuten lortu.