Izaro Blanco oso pozik dago asteburuan Badajozen eskuratutako Espainiako Boxeo Txapelketarekin. Izan ere, orozkoarrak uste du oraindik ikasten ari dela kirol horretan, jatorriz kick boxinga baita bere diziplina.
Garaikurra lortzeko hiru borroka irabazi behar izan zituen Euskal Selekzioko kideak. Galizia eta Madrilgo ordezkariak menperatu zituen lehenengo bi kanporaketetan eta finalean Espainiako Selekzioko taldekide bat izan zuen aurkari.
Blancok aipatu du norgehiagoka guztiak izan zirela gogorrak, baina bereziki zaila izan zela azkena, bere aurkariak esperientzia handia baitzuen.
Txapelketan Jose Luis Celaya entrenatzailea izan zuen bidelagun. Prestatzaile horrekin aritzen da Gasteiz Sporten eta lehiaketarako sasoian egoteko K2 gimnasioan eta Laudioko Basque Fight Team-en ere aritu da.
Espainiako txapelduna bi aldiz aurten
Aipatzeko modukoa da Izaro Blanco Espainiako bi txapelketetan nagusitu dela aurten. Izan ere, asteburu honetako garaipenari gehitu behar zaio apirilean bereganatu zuen Espainiako Kick Boxing Txapelketa.