Gotzon Martinek Euskaltel-Euskadirekin kontratua luzatuko du, beste bi urtez behintzat. Horrela jakinarazi du Euskadi Fundazioak, eta azaldu du hamarkada bat baino gehiago beteko duela horrela txirrindulariak egituran.
Izan ere, talde laranjari lotuta dago orozkoarraren ibilbide osoa: Amateur mailako lehen urtean estreinatu zen 2015ean, 2018an profesionaletara jauzi egin eta 2020tik aurreta eliteko ProTteam mailan. Hori dela eta, "familia eta etxea" da taldea Martinentzat, eta poztasuna adierazi du bertan jarraitzeagatik: "Bizitza osoan hazi naizen proiektua da; amateur mailako lehen urtetik daramat hemen, eta nire ibilbide profesional osoa hementxe eman dut. Niretzat hau da nire familia, nire etxea: eroso nago, dena ikasi dudan lekua eta prestatu nauten lekua. Beraz, oso pozik nago beste bi urtez jarraituko dudalako".
Mikel Landa taldera batu izana ere goraipatu du txirrindulari orozkoarrak eta bai berarekin eta baita Hodei Muñoz luiaondoar gaztearekin batera lehiatzeko gogotsu dagoela adierazi du: "Egunero entrenatzen naiz berarekin (Mikel Landarekin), eta, taldekide bat ez ezik, lagun bat ere bada; beraz, taldean edukitzea benetako onura da. Aparteko bultzada da bere ondoan lehiatu ahal izatea, baita etxetik oso gertu dudan Hodeirekin ere. Gogotsu lehiatuko naiz, beraz, hurrengo bi denboralditan, nire kirol maila eta eskarmentua partekatzeko".
Jorge Azanza Euskaltel-Euskadiko kirol arduraduna ere pozik eta Martinen berritzeagatik, eta azaldu du harrobiko gazte bat "taldearen kirol erreferentzia nagusietako bat bihurtzen ikusteak harrotasunez betetzen" dituela eta "proiektuaren indarra" erakusten duela. Izan ere, aurten orozkoarra izan da taldeari UCI puntu gehien eman dizkion bigarren txirrindularia.
Lasterketei dagokienez, Arctic Race (abuztuaren 13tik 16ra) eta Bretagne Classic (abuztuaren 30ean) dira Martinek egutegian markatuta dituen hurrengo hitzorduak, Italiako klasikoen biraren aurretik.