Maria Luisa Goikoetxeak salatu du ADIF ez dela hitzemandako epeak betetzen ari. “Eurekin Madrilen izan nuen bileran agindu zidaten bagoi egokitua udarako jarriko zutela, baina horretarako obrak eginak egon behar dira lehendabizi, eta obraren lizitazioarekin baldin badaude oraindik...”, adierazi du.
Esleitu berri ditu ADIFek Urduñako tren geltokiko obrak, 929.433 euroko aurrekontuarekin. Hainbat hobekuntza egingo dituzte: bi nasen altuera areagotzea, nasa batetik bestera igarotzeko arrapala eta barandak jartzea, sarreraren ber-antolaketa egitea, LED motako argiteria instalatzea, hainbat gela berritzea eta hesiak ezartzea espazioen arteko banaketak egiteko.
Obra gehiago
Hori ez da izango ADIFek egingo duen obra bakarra Urduña eta Bilbo arteko C-3 linean. Amurrion ere hainbat inbertsio egingo dituzte geltokia irisgarria bihurtzeko, eta badago baita Aretan hainbat obra egiteko diru-partida bat ere, Espaianiko Aurrekontu Orokorretan EAJk PPrekin adostutakoa.
Maria Luisa Goikotxeak 2015ean ekin zion sinadurak biltzeari Renfe eta Adifi C-3 linean irisgarritasuna bermatzea eskatzeko. 120.000 sinadura biltzea lortu zuen, eta Espainiako Sustapen Ministeriora eraman zituen martxoan.