Interneteko plataforman agertu dute kezka: Udal sukaldearen blokeoa. "Udal Sukaldearen proiektua tokiko produktu ekologikoak erabiltzean datza funtsean, ekoizle eta dendari txikiei zuzenean erostean generoa. Tokiko garapena bultzatzeko proiektua da, hiri osoari eragingo diona, hainbat onurarekin: osasuna, ingurumena, ekonomia eta urduñarren bizi kalitatea". Horregatik nahi dute udal sukaldeak prestatzea Urduñako Eskolako janaria.
Guraso Elkarteak adierazi duenez, Eusko Jaurlaritzako Osasun Sailak oztopatu du garapena. Hezkuntza Sailak bi urtez "froga pilotoa egitea" baimendu zuen. 2011n, berriz, Osasun Arloko txostenak emaitza positiboak bildu zituen, beraz, badaude proiektua abiatzeko baldintzak. Guraso Elkartearen arabera, zortzi urte igaro dituzte sukaldea atontzeko lanean: "Diru publikoa inbertitu da. Ez, ordea, beharrezko txosten eta baimenak eskuratu gabe. Sailetatik ezarritako prozedurak jarraitu ditugu".
Osasun Publikoaren hitzetan, proiektuak ez du betetzen indarrean dagoen araudia. "Arazoak planteatzen dituzte, baina ez konponbideak", kritikatu dute. Hori dela eta, Urduñako Eskolako Guraso elkarteak borondate falta egotzi dio Eusko Jaurlaritzari: "Denbora asko egon gara itxaroten, eta iritsi da unea egoera publiko egiteko".
_tokikom_735x413.jpg)