Ostiralean, irailaren 1ean, hasiko dira festak. El Trasno Giata banda izango da kaleak girotzearen arduraduna, 19:30etik aurrera. 20:30ean izango da musika taldeen Urdufolk lehiaketako finala. 20:30ean taularatuko da Khidou madrilgo taldea.
Bertako musikariak ere igoko dira oholtzara, Iñaki Plaza kasu. 22:00etan izango da hori, Foru plazan. Aurreratu dutenez, gainera, gonbidatu bereziak egongo dira: Tejedor, El Trasno Giata banda, Ialma eta Garikoitz Mendizabal, besteak beste.
Bizkaiko Marmitako Txapelketarekin abiatuko dute larunbata, 9:00etan. Batzuk sukaldu bitartean, baina, besteek haurren jolas parkeaz gozatzeko parada izango dute; puzgarriak eta apar jaia prestatuko baitituzte plazan.
Arratsaldean, berriz, Koroatze Jaietako IX. Bolo Txapelketa egingo du Txolope elkarteak. 20:30ean helduko diote Urdufolk jaialdiari, bigarren finalistaren doinuen eskutik; hots, Bruna Sonora taldea (Madril). Jarraian Galizia eta Belgikako kideek osatzen duten Ialma taldea taularatuko da, eta amaitzeko Verea (Extremadura).
Igandean bukatuko dira festak. Dena dela, ez da ekitaldirik faltako. Batetik, bolo txapelketa eta meza nagusia egongo dira; bestetik, Bihotza konpartsak antolatutako erraldoi eta buruhandien hamargarren topaketa eta, azkenik, Euskal Kanta herrikoen laugarren topaketa.
Horrez gain, Urduñako Pelotazale Elkarteak gazte kategoriako emakumezkoen eskupilota eta pala partidak eskainiko ditu 17:30ean frontoian. Dantza izango da jaien itxiera arduraduna, Erauntsi taldearen emanaldiaren ondotik dantza-plaza izango baita Saltoka taldearekin.
