Antolatzaileek jakinarazi dute manifestazioa legezkoa izango dela eta mahai-ingurua 18:30ak aldera hasiko dela. Solasaldian urduñar gazte batek hitz egingo du, baina edonork izango du aukera hitza hartzeko.
Protestaren sustatzaileek argitu dute ideia ez dela Urduñako Zezenketen Kontrako Taldearena, baizik eta norbanakoena, nahiz eta animalien aldeko taldeko kideek parte hartuko duten.
Nabarmentzekoa da egunean bertan 18:00etan izango dela Iván Fandiñoren omenaldia. Korridan toreatzaile ospetsuak arituko dira, Enrique Ponce, besteak beste.
Berez, toreatzaile urduñarraren aldeko solasaldiak ere egongo dira, gaur, adibidez.
Estatuaren polemika
Iván Fandiñoren omenaldiak polemika handia eragin du. Izan ere, zenbait zaletuk sinadura bilketa egin zuten; udalari eskatzeko toreatzailearen estatua zezen-plazan beharrean, herriko plazan jartzea. Edonola ere, udal gobernu taldeak ez du kokapena aldatu.
Eztabaida horrek hautsak harrotu ditu sare sozialetan zezenzaleen eta aurkarien artean, baita kokapena leku batean edo bestean nahi dutenen artean.
Zezenketatik harago, Urduñako Pilota Elkarteak Iván Fandiño omendu du asteburuan, taldeko kidea izan baitzen.
