Azken urteetan bezala, Urduñan egingo dute txirrindulariek ziklokros denboraldiko lokatzera jauzi. Bertan jokatuko da Euskal Herriko Federazioak prestatutako ziklokros egutegiko lehenengo lasterketa, urriaren 12an.
Urduñako Txirrindulari Elkarteko kideek hilabeteak eman dituzte proba prestatzen: zirkuitua eta taldeek erabiliko dituzten “box-ak” atontzen.
Eskualdeko kirolariak ere prest daude urriaren 12ko lasterketarako. Iaz ziklokros modalitatean erakutsi zuten maila altuari eusteko erronkarekin datoz aurtengo denboraldira.
Besteak beste, Luisa Ibarrola eta Mikel Beraza aiaraldearrak gailendu ziren iazko edizioetan. Gerora biek lortu zituzten marka oso onak Espainiako Ziklokros txapelketan. Luisa Ibarrola, Espainiako Txapeldun izatea lortzeaz gain, nazioartean ere aritu zen, Munduko Txapelketan.
Datorren ostiralean 11:00etan hasiko da kirol proba. Kadeteak izango dira irteera lerrotik abiatzen lehenak. Elite eta 23 urte azpiko kategoriek itxiko dute eguna, 15:50ean lehiatuko dira. Izena emateko epea zabaldu berri dute, internet bidez egin daiteke.
Laudio, nazioarteko ziklokrosean erreferente
Urriaren 12an Urduñan hasi eta urtarrilaren 6an Ormaiztegin amaituko den ziklokros egutegiak beste behin bisitatuko du eskualdea: Laudioko Nazioarteko Ziklokrosaren XXXI. edizioan.
Urriaren 27an jokatuko da nazioarteko egutegian erreferente bilakatu den lasterketa. Aurten ere Nazioarteko C1 kategoriako norgehiagoka izango da, baita Espainiako Koparako froga puntuagarria ere. Laudioar Txirrindula Elkarteko kideek hilabeteak daramatzate eguna antolatzen. “Goiz eta arrats gaude lan egiten azken edizioetan erakutsitako antolaketa maila altua mantentzeko”, jakinarazi dute.