Mendiko aterpe berria izango du aurki Gorobel mendilerroak, Urduñako San Vitores Mendikoborda elkarteak urtea bukatu aurretik ekingo baitio horren eraikuntzari. Eraikin berria Txarlazoko igoera erdian egongo da kokatuta. “Bidea gailurra bezain garrantzitsua eta pozgarria dela gogorarazteko” aukeratu dute lekua.
Duela 10 urte hasi zen urduñar talde bat aterpearen proiektua garatzen. 2013an lehen bilera egin zen Txarlazo Mendi taldearen, Larruazabalgo Administrazio Batzarraren, herriko abeltzainen eta Urduñako Udalaren artean, egitasmoaren oinarriak zehazteko. Gerora sortuko zen San Vitores Mendikoborda elkarteak hartu du aterpea eraikitzeko ardura.
Obrak hasi aurreko azken prestaketak burutzen dabiltza orain elkarteko kideak. Urtea bukatu aurretik ekingo diete lanei, eta auzolanean burutzeko aukera aztertu dute. Orotara 17.000 euroko kostua izango du aterpeak.
150 metro koadro
75 metro koadroko harrizko aterpe bat izango da, “paisaian integratzeko helburuarekin”. Atariarekin batera, 150 metro koadro izango ditu guztira proiektuak.
Aterpe irekia izango da, Gorobel mendilerroan ezaugarri hau duen lehen aterpea izanik. “Europa iparraldean oso ohikoa da eredu hori baina eskualdean lehenengoa izango da", azaldu dute egitasmoaren sustatzaileek.
Interes eta beharra duen orok erabili ahalko du, beraz, Txarlazo magaleko aterpe hori, “elkarrizketarako, bokata bat elkar banatzeko, izarrak ikusteko, hausnarketarako… espazioa izango da”.
Aterpearen kudeaketaz, mantenuaz eta garbiketaz San Vitores Mendikoborda elkartea arduratuko den arren, mendizale guztien laguntza eta kolaborazioa eskatu dute, “guztiontzako leku jasangarri eta atsegin bat eraikitzeko”.