Azaroaren 23tik abenduaren 3ra murgilduko da Euskaraldian Urduña ere. Aurrez, baina, makina bat ekintza antolatu dituzte Ahobiziak eta Belarriprestak elkartzeko. Hilabeteko ostiral guztietan, esaterako, zumba saioa gidatuko du Izaskun del Cerro dantzariak. Foru plazan izango da hori, 17:30etik aurrera. Besteak beste, Euskaraldiko koreografia dantzatuko dute. Azaroaren 16an, ordea, "Kartoizko bandaren entsegua" batuko zaio ekimenari. 17:00etan izango da material birziklatuekin osatutako musika tresnen ekintza.
Baina zer da Ahobizi eta Belarriprest izatea? Tailer bidez erantzungo diote galderari, azaroaren 12an Alondegian. "18:30-19:30 izango da prestakuntza saioa", adierazi dute Euskaraldiko Batzordeko kideek. Izen-emateak indartzeko, berriz, informazio mahaia jarriko dute Urduñako Mendi Maratoian, baita "photocall-a" ere.
Euskaraldiaren hasiera eta bukaera jaia
Horrez gain, azaroaren 23an eta abenduaren 3an festa banarekin emango diote hasiera eta amaiera Euskal Herriko ekimenari. Azaroaren 23an, 17:30ean jaurtiko dute txupinazoa. Koreografia egin ondoren, herri argazkia aterako dute Foru plazan. Aurreratu dutenez, 18:30etik 19:30era "Euskaraz abestu eta jolastu" tailerra egongo da haur eta helduentzako.
Abenduaren 3an -Euskararen Nazioarteko egunean- Euskaraldiaren bukaera festa egingo dute. Batetik, kartoizko bandaren kalejira egongo da eskolatik Foru plazara, eta bestetik, txokolatadaren ondoren "Puski, Txurruski eta Mariski" ikuskizuna.