Aiaraldearren errezetak

[ERREZETAK] Bakailoa pil-pilean, German Urruelaren eskutik

German Urruela sarri aritu da bakailo txapelketetan epaile. / Aiaraldea.eus

German Urruela Amurrioko bakailo txapelketako epailea da. Jakia prestatzeko prozedura eta gomendioak azaldu ditu. 

OSAGAIAK (8 lagunentzat)

  • 2,2 kilo bakailao
  • Oliba olio birjina estrako litro bat
  • Garraztasun gradu batekoa)
  • Baratxuri gorriko 30 hagin
  • Buztinezko kazola
  • Xiringa
  • Edalontzia
  • Baldea
  • Toallak
  • Trapuak
  • Koilara eta sardexka
  • Kazola (oliorako)

PRESTAKETA

  1. Bakailaoa ur-balde batean sartu 48 orduz hozkailuan (6-8 gradura). 8 orduro ura aldatu behar da. Lehen ur aldaketa egiten denean ezkatak eta hezurrak kendu. Oharra: Bakailao xerrak meheak badira 36 ordurekin nahikoa izan daiteke.Behin 48 orduak igarota bakailaoa uretatik atera eta eskutrapu edo toalla batzuetan bilduta utzi, bandeja batean, hozkailuan, kozinatuko den egunera arte.
  2. Olioa kazola batean jarri baratxuriekin batera. Baratxuriak sueztitu behar dira, baina ahalik eta geldoen (50 minutu inguruko prozesua da). Noizbehinka mugitu egin behar dira erre ez daitezen. Behin sueztituta, baratxuriak oliotan utzi kazolan, tapa gainean jarrita (koilara batekin zirrikitu bat irekita utzita).
  3. Buztinezko kazolaren azalera guztia baratxuri gordin batzuekin igurtzi behar da. Behin hori eginda, bakailao zatiak gurutze forman kokatu behar dira, azala gorantz begira dutela. Ondoren, beste kazolan baratxuriekin dagoen olioa hartu eta buztinezkoan sartu behar da, iragazita, likidoak arrain zatiak estali arte.
  4. Sardexkarekin bakailao zatiak mugitu , euren azpian ere olioa sartu dadin.
  5. Kazola ezin da sutan zuzenean jarri, apurtu egingo litzatekeelako. Plantxa batean jartzea da egokiena, beroa kazolaren azalera guztian berdin barreiatu dadin.
  6. Su erdira jartzen da kazola. Lehen olio-burbuila agertzen denean sutik kendu behar da eta 10 minutuz utzi behar da tapa jarrita duela eta toalla batekin estalita.
  7. Ondoren, berriz jarri behar da sutan. 15-16 olio-burbuila agertzen direnean berriz kendu behar da eta aurreko prozesu bera errepikatu, beste hamar minutuz.
  8. Kazola suan hirugarren aldiz jartzerakoan olioa “harro” jarri arte itxaron (irakiten hasi baino lehen gertatzen den egoera).
  9. Une hori iristen denean sutatik kendu eta tapa eta toalla jarri berriz.
  10. Beste hamar minutu igaro ostean, tapa ireki. Kazolaren erdian dagoen bakailao zatia altxatu eta behean dagoen ura xiringa batekin kendu behar da. Ur hori baso batean jarri behar da, gero erabiltzeko (baso bete ur atera daiteke dagoen ur guztiarekin). Ondoren, arrain xerra berriz bere tokian jarri behar da.
  11. Kendutako ur hori platerari gazitasuna eman edo kentzeko baliatu daiteke. Bakailaoak gatz gehiegi badu urari azukrea gehitu eta berriz kazolara isuri. Arraina geza baldin badago, aldiz, urari gatza bota eta prozesu bera burutu.
  12. Ondoren, bakailao zatia berriz bere tokian jarri. Kazola kontu handiarekin mugitu, alde batera eta bestera, 20 minutuz. Modu horretan gelatina aterako da. Ondoren, sueztitutako baratxuri politenak hautatu eta bana jarri arrain zati bakoitzaren gainean.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide