Tarte batez itxita egon ostean, "No eres de Orduña..." Facebook taldea itzuli da. Izen eta kudeatzaile berriak ditu eta orain "No eres de Orduña.../ Ez zara Urduñakoa..." da.
Aitor Martinezek behin-behineko itxiera iragarri zuen hausnarketa egiteko. Bolada horretan hiriko erakunde eta elkarteekin jarri da harremanetan eta herritar talde batek hartu du egitasmoaren kudeaketaren ardura. Horretarako, "Honi buruz" atalean zehaztu dute bere erabilera zein den.
"Taldea sortu nuen Urduñako leihoa izan zedin mundura begira, baina azken aldian bilakatu zen kexak eta eztabaidak argitaratzeko tokia eta erabat deskontrolatu zen. Helburua ez zen hori" azaldu du urduñarrak. Euskarari ere atentzio gehiago jarriko diote arduradun berriek.
"Kudeatzaile berriek elkarbizitzarako arauak argi jarri dituzte eta laster esteka batzuk jasoko dituzte, nahi duenak bere kexak eta iradokizunak dagokion helbidera bidali ditzan" aurreratu du sortzaileak.
Polemika eta babesa
Momentuz, Aitor Martinezek erabaki du atsedena hartuko duela taldearen kudeaketan: "esan bezala, "No eres de Orduña" ez nuen abiatu jendeak eztabaidatzeko eta mokoka aritzeko, baizik eta Urduña erakusteko. Horregatik betoa jarri nien zenbait gairi: zezenketei, adibidez. Horrek kritika asko ekarri dizkit eta batzuek seinalatu naute herrian. Errespetu faltak ere jasan ditut."
Hala ere, sortzaileak azpimarratu nahi du ehunka babes mezu ere jaso dituela modu pribatuan: "politena izan da ikustea ez bakarrik herriko jendeak, baizik eta kanpoan bizi dena ere animoak eskaini dizkidatela. Argentina, Mexiko, Estatu Batuak, Txile... leku askotatik idatzi didate. Estatu espainiarreko ia txoko guztietatik ere egin dute. Historia hunkigarriak daude horren atzean maiz; batzuk kanpora joan ziren bizitzera edo bere familia hemengoa da, baten batek Urduñan egin zuen zerbitzu militarra edo hirian ikasi zuen."
