aiaraldea.eus

Coplasva enpresa ez da Urduñara mugituko eta Amurrion geratuko da azkenean

Erabiltzailearen aurpegia Aitor Aspuru Saez   Ekonomia  Urduña

Urduñako Udalak jakinarazi du Coplasva enpresa ez dela udalerrian instalatuko. EH Bilduk leporatu dio EAJri bere hauteskunde kanpainan baliatzea gertatu ez den leku aldaketa, eta jeltzaleek azaldu dute enpresak berak iragarri zuela asmo hori, ez alderdiak.

Coplasva enpresa ez da Urduñara mugituko eta Amurrion geratuko da azkenean
Urduñako industriaguneko Elkartegia./ Urduñako Udala | Ikusi handiago | Argazki originala

Amurrion geratuko da Coplasva enpresa, ondorioz, ez da Urduñara mugituko. Horrela iragarri du tokiko udalak. Maiatzean zabaldu zen Saratxon kokatuta dagoen lantegia Bizkaiko hirian instalatuko zela, baina azkenean ez da horrela izango.

Udalak azaldu du zenbait aldaketa egin dituela enpresak erakartzeko, adibidez, ekonomiaren aktibatzeari lotutako tasak eta zergak arautzen dituzten ordenantzetan. Horrela, 200.000 eurotik gorakoak diren eta lanpostuak sortzen dituztela frogatzen duten enpresa-ekimenek %50eko hobaria izango dute zergan.

Ugal Gobernu Taldea lau aldiz elkartu zen enpresako zuzendaritzarekin, ekainaren 20an, uztailaren 12, abuztuaren 2an eta 8an.

Halaber, jarduera ekonomiko berriak industriagunera hurbiltzeko lanean jarraituko duela adierazi du tokiko erakundeak. Edonola ere, udalak argitu du Amurrion eskaintza ekonomiko hobea lortu duela Coplasvak.

EH Bilduk leporatu dio EAJri gaia hauteskundeetan baliatzea
EH Bilduk prentsa oharra zabaldu du salatzeko EAJk Coplasva enpresaren ustezko leku aldaketa hauteskundeetan erabili zuela bere mesederako: "EAJko buruek beren gestioen ondorioz Coplasva ekarri zutela iragarri zutenean, enpresaren etorrera hauteskunde kanpainako arma gisa erabili zuten. EH Bilduren aurkako tresna gisa erabili zuten enpresaren etorrera, diskrezioz jokatu ordez, erabaki gabe zegoena lau haizetara zabalduz".

EH Bilduk oharrean gaineratu duenez, enpresaren iritsieraren iragarkia hauteskunde kanpaina betean eman zen: "Albistea efektu kolpea izan zen, alderdi jeltzaleak ez zuen aukera alferrik galdu eta pabilioi berria eraikiko zen orubearen aurrean bere hautagaien argazkiak argitaratu zituen. Hori gutxi balitz Urduñako EAJk alderdiaren facebook orrian lanpostu berriak betetzeko lan eskaintzak iragartzera ere heldu zen. Urduñan EAJren udal kanpainaren ardatza izan zen albistea". 

Koalizioak aipatu du enpresarekin zenbait bilera egin ostean, gerentziak adierazi diola udalari Amurrion mantenduko dutela negozioa.

Jeltzaleen erantzuna
Iñaki Cuadra EAJko buruak argitu du bere alderdiak ez zuela zabaldu Coplasvaren leku aldaketa hauteskundeetan: "EAJk ez zuen erabakiaren berri eman, Coplasva enpresako kudeatzaileak berak jakinarazi zien hedabideei. Guk berarekin azarotik egin genituen bilerak Urduñara mugitzeko, Azpiegituraren laguntzaz, baina enpresako zuzendariak zabaldu zuen bere asmoa, ez guk".

Halaber, Cuadrak azpimarratu du EAJk ezin zuela ezer gehiago egin, zergen eta arauen kudeaketa Udal Gobernu Taldearen ardura baita. Zentzu berean, EH Bilduri leporatu dio interes falta enpresaren gainean egoteko eta laguntzeko.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa