aiaraldea.eus

[IRITZIA] Hamar urte

Erabiltzailearen aurpegia Arantza Ancizar Periañez   Iritzia  Urduña
[IRITZIA] Hamar urte
Greba feministak Urduñan utzitako irudietako bat. / Aiaraldea.eus | Ikusi handiago | Argazki originala

Duela 10 urte, gure aurrekoek egindako lana aprobetxatuz, beti beste batzuk ibili direlako bidea irekitzen, Adi Emakumeak taldearen lekukoa jaso genuen.

Garai hartan ez genuen pentsatuko 2017ko martxoaren 8an Urduñan, Aiaran, bizi izan genuenaren moduko mobilizazioa biziko genuela. Grebaren esperientziak erakutsi ziguna da antolaketa garrantzitsuagoa den lekuetan deialdiek arrakasta handiagoa izan zutela, eta hor egon zen Euskal Herria.

Duela 10 urte, azaroaren 25aren inguruan, gutxi batzuk ateratzen ginen; gaur egun, askotariko jendea batzen duen esperotako eguna da. Jaietan gertatzen diren eraso sexisten aurkako protokoloa abian jarri genuen, eta horrek aukera eman zigun eskualdeko laguntza-sare bat planteatzeko, erantzun antolatu bat emateko eta, gainera, belaunaldien arteko topagune bat sortzeko.

Antolatzea, kontzientzia hartzea, sareak sortzea auzoetan, herrietan, hiriburuetan… Batzuetan ikusezina den lan horrek eraiki egiten gaitu eta fruituak ematen ditu. Izan ere, gaur egun ditugun eskubideetako bat bera ere ez da posible izan emakumeen borroka indibidual eta kolektiborik gabe, eta ez dira inoiz izango.

Dagoeneko berdintasuna agendan dagoen arren, hori posible egin duten emakume antolatuen belaunaldien lana ikusezin bihurtzen da. Horregatik da funtsezkoa historia ezagutzea, gure genealogia, eta hortik Aiaran egiten ari diren memoria feminista eta emakumeen memoria berreskuratzeko lanaren garrantzia. 10 urte hauetan gauzak aldatu dira, orain deialdi-boterea eta belaunaldi-erreleboa ditugu. Boteredun feminismoa buru duten beldurrik gabeko gazteak, beste mugimendu batzuek galdu duten mobilizazio eta kontzientziazioarena. Diskurtso feminista egungo eztabaiden abangoardian dagoelako, hizkuntza asko hitz egiten dituelako eta askotariko esperientziez elikatzen delako, gai delako beste eragile batzuekin elkarlanean aritzeko eta bizitzaren iraunkortasunaren aurka doan eredu sozial eta ekonomikoa modu egiazkoan birplanteatzen ari den diskurtsoa izateko.

Garai batean, sorginak, jakintsuak eta libreak su misoginoetan erre gintuzten. Gaur egun, sua feminista da, eta hor erre behar dira zeharkatzen gaituzten bidegabekeria patriarkalak eta kapitalistak.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa