Euskal Aktoreen Batasunak prentsa oharra plazaratu zuen atzo ETBren Alardea telesailaren ekoizpenean jazotako zenbait gauza salatzeko. Oharrean zehazten denez, telesail horren grabaketan parte hartu duten hamar kide gaixotu dira, eta horietako batek positibo eman du koronabirus azterketan (gainontzekoei ez diete proba egin).
Azaldu dutenez, larunbatean jaso zuten lantaldeko hiru kide Covid-19aren sintomekin zeudenaren albistea. Ostiralean Urduñan grabaketak egiten aritu zen lantaldea.
Hargatik, gogor kritikatu dute ETBk erakutsitako jarrera: “Ekoizpeneko arduradunek ez zieten ez aktoreei ez eta lantaldeko gainontzeko langileei egoera honen berri eman. Informazio gabezia honek ardura eta beldur egoera sortzen du lantaldean, ekidin zitekeen zerbait ekoizpena bertan behera utziz, beste ekoizpen batzuekin egin zen bezala”. Oharren kontatzen denaren arabera, igande gauera arte luzatu zen egoera hori, orduan jakinarazi zitzaielako langileei ekoizpena bertan behera geratzen zela.
Horrek lantalde osoaren eta ingurukoen osasuna arriskuan jarri zuela uste dute Euskal Aktoreen Batasunako kideek. Gauzak hala, ETB, Mediapro eta K2000ren “arduragabekeria eta enpatia falta” salatu dituzte, “erabaki horrek edo erabaki ezak arrisku egoeran jarri duelako lantaldeko osasuna eta bizia”.
Itziar Ituño (La Casa de Papel telesailagatik ezaguna bihurtu den aktorea) da gaixorik dagoen langileetako bat, instagramen kontatu duenez.
Hemen irakurri daiteke oharra osorik.