Osakidetzak plazaratu berri duen txostenaren arabera, atzo Aiaraldea osoan positibo berri bakarra topatu zen COVID-19ari dagokionez, Urduñan. Datu horrekin kutsatu berrien kopurua pasa den asteko joerara itzuli da. Izan ere, asteburuan 10 gaixo berri agertu baziren ere, pasa den astean kasu bat edo bi agertu ziren egun bakoitzean.
Edonola ere, atzo osasun sistema publikoak 7.373 PCR proba egin zituen. Igandean egindakoak baino gehiago diren arren, kontuan hartu behar da ostiralean 9.229 gauzatu zirela eta larunbatean 9.696. Guztira, 285 positibo berri agertu ziren EAEn, asteburuan baino nabarmen gutxiago: ostiralean 398 izan ziren, larunbatean 479 eta igandean 354.
Atzoko kutsatuei dagokienez, 39 izan ziren Araban, 138 Bizkaian eta 99 Gipuzkoan. Ospitaleratuak 8 gutxiago dira -265-, baina Zaintza Intentsiboko Unitatea behar dutenen kopurua ez da aldatu, 55 herritar baitaude bertan. Gainera, ratioa handitu eta 0,94ra heldu da.
Eskualdeko kutsatuen kopuruak pandemia hasi zenetik hurrengoak dira, herriz herri:
- Laudio: 275
- Amurrio: 179
- Aiara: 76
- Urduña: 70
- Okondo: 16
- Orozko: 35
- Artziniega: 36
- Arakaldo: 0
- Arrankudiaga-Zollo: 2
- Aiaraldea: 686