Mozioa aurkeztu zuen Urduñako Sarek iragan abenduaren 30eko ohiko osoko bilkuran. Urduñako hainbat herrikidek dispertsio-politikaren ondorio sozial, ekonomiko eta pertsonalak pairatzen dituztela salatu zuten testuaren aurkezpenean, eta baldintza horien deuseztapena lortzeko konpromisoa azaldu zuten, “preso, iheslari zein deportatuen bizi baldintzak hobetu eta egoera arintzeko”.
Udalbatzak aho batez onartu zuen Sarek aurkeztutako mozioa, eta hurrengo egunetan antolatuko dituen ekimenetan parte hartzeko deia luzatu zuten udaletxetik.
Banderola balkoira
Duela hilabete batzuk “Banderola gure kontu” kanpaina abiatu zuten Urduñan, euskal preso eta iheslarien etxeratzearen aldeko ikurrak herriko balkoietan jartzeko helburuarekin.
Iragan abenduaren 30eko osoko bilkuran kanpaina hori udaletxera eraman zuten, eta aurrerantzean dispertsioaren aurkako bandera udaletxeko balkoian egongo da eskegita.
Mobilizazio asteburua
Bihar -urtarrilak 9- herriz herri mobilizazioak antolatu ditu Sarek, urteroko Bilboko manifestazio nazionalaren ordez. Euskal Herriko 220 herritan daude deituak ekimenak, baita Aiaraldean ere.
Urduñan kalejira egingo dute, Foru Plazatik hasita, 17:30ean. Hainbat aldarrikapen zabalduko egingo dituzte hirian zehar, jai giroan. Frontoian amaituko dute kalejira, eta ekitaldia egingo dute bertan. Besteak beste, Isilpeko ahotsak proiektatuko dute, dispertsioak eta espetxe politikak urduñarrengan izandako eragina bistaratzeko egindako bideoa.
Amurrion, Laudion, Okondon, Arrankudiagan eta Orozkon ere egingo dituzte mobilizazioak. 17:30ean dira hitzordu guztiak. “Urratsez urrats, bidea egiten ari gara. Etxerako bidea auzolanean eraikiko dugu” adierazi dute Sareko kideek.